As xornadas

A renda básica pódese definir coma un ingreso regular que permite levar unha vida digna (suficiente) para cada membro da sociedade (universal) polo simple feito de ter nacido (incondicional) e xestionada por cada quen (individual).

En relación a esta definición cabe precisar:

• Suficiente: Por riba do limiar da pobreza, para acabar con ela. Non se trata dunha esmola nin dunha prestación insuficiente como as que estamos afeitas/os a ver coa Renda de Integración Social de Galicia (RISGA). A cantidade ten que ser abonda para permitir vivir con dignidade. A proposta da Red Renta Básica sitúaa por riba do limiar da pobreza (definido como o valor que corresponde ao 60 % da mediana da renda nacional equivalente en unidades de consumo), no entorno de 710 euros no ano 2017.

• Universal: Para todas as persoas residentes legais no territorio de implantación.

• Individual: A Renda Básica enténdese como dereito social e humano de carácter individual. Non é para a unidade de convivencia (como a familia) nin para a comunidade da que formas parte (tribo, barrio…). É importante para evitar discriminacións por razóns de sexo, idade (mozas/os ou maiores que residen cos/coas pais/nais-fillos/as), minorías, etc.

• Incondicional: Para recibila non hai nada que demostrar. A Renda Básica parte da desaparición de subsidios condicionados, nomeadamente as Rendas de Integración, o paro de longa duración, as pensións non contributivas, etc. Hai que aclarar que substitúe a esta prestación sempre que esta sexa inferior; en caso de ser superior, cobraríase a prestación e non a Renda Básica. Por tanto, vaise cobrar sen ningún tipo de condición. Traballes ou non, sexas rica/o ou non, nova/o ou vella/o… (tan só se limita en menores de idade que, na maioría dos modelos de financiamento, cobrarían unha porcentaxe do total).